जन्मभुमि खबर ,
पोखरा ।
नेपाल टेलिभिजनबाट प्रशारण हुँदै आएको ‘दोहोरी रियालिटी शो’ ‘दोहोरी च्याम्पियन’को ग्राण्ड फिनाले कार्तिक १३ गते पोखरामा हुने भएको छ । आयोजकले ग्राण्ड फिनाले पोखरामा भव्य रुपमा सम्पन्न गर्ने निर्णय गरेको जानकारी दिएको हो ।
‘दोहोरी च्याम्पियन’मा प्रथमका लागि प्रकाश पराजुली र मीना बुढाथोकीको टीम फिनालेमा प्रवेश गरिसकेको छ ।
आउँदो शनिबार बालचन्द्र बराल र शोभा कार्कीको टीमसँग राजेन्द्र पाठक र मीना नेपाल टीमको प्रतिस्पर्धाको नतिजा सार्वजनिक हुनेछ । यसमा विजयी टीमले ग्राण्ड फिनालेमा प्रथमका लागि प्रकाश पराजुली र मीना बुढाथोकीको टीमसँग प्रतिस्पर्धा गर्नेछ । यी दुई टीमको प्रतिस्पर्धामा एउटा प्रथम र अर्को टीम द्धितीय हुनेछ ।
अर्को टीमले भने तृतियका लागि सबिन आचार्य र रीता राउतसँग प्रतिस्पर्धा गर्नेछ । दर्शकको भोटिङको आधारमा विजेता घोषित गरिनेछ ।
दोहोरी च्याम्पियन’लाई लोकदोहोरी क्षेत्रकै ठूलो दोहोरी रियालिटी शो भनिएको छ ।
यसमा प्रथम हुने टीमले २० लाख रुपैयाँ प्राप्त गर्नेछन् भने १ करोड बराबरको जीवन बीमा हुनेछ । दोश्रो हुने टीमले १० लाख रुपैयाँ प्राप्त गर्नेछन् भने ५० लाख बराबरको जीवन बीमा हुनेछ । त्यस्तै, तृतिय हुने टीमलाई ३ लाख र सान्त्वना हुने टीमलाई २ लाख रुपैयाँ पुरस्कारको व्यवस्था गरिएको छ ।
सांगीतिक संगै चलचित्र तथा हास्यव्यङग्य क्षेत्रका कलाकारहरुको उपस्थितिकामा ग्राण्ड फिनाले हुने आयोजकले जनाएको छ । पोखराको कहाँ फिनाले हुने भन्नेबारे केही दिनमा तय गरिने जनाईएको छ ।
नेपाल टेलिभिजनको प्रस्तुती रहेको ‘दोहोरी च्याम्पियन’मा निर्णायकका रुपमा लोकदोहोरी गायक प्रजापति पराजुली, लोकदोहोरी गायिका सीता थापा, राष्ट्रिय लोक तथा दोहोरीगीत प्रतिष्ठानका अध्यक्ष समेत रहेका गीतकार रमेश बि.जी. र गायक तथा गीतकार चन्द्र शर्मा छन् ।
लोकदोहोरी गायक बद्री पंगेनी र लोकदोहोरी गायिका प्रिती आले ‘दोहोरी च्याम्पियन’को संचालकको भूमिकामा छन् । शनिबार राती ८:५० बजेबाट नेपाल टेलिभिजनमा ‘दोहोरी च्याम्पियन’ प्रशारण हुँदै आएको छ ।
