जन्मभुमी को आबाज || आबाज बिहिनकाे आबाज

सांसद दिपक मनाङेकी श्रीमती धरौटीमा रिहा

जन्मभुमि खबर । गण्डकी प्रदेशसभा सदस्य राजीव गुरुङ (दीपक मनाङे)की श्रीमती दिक्छेन लामा धरौटीमा रिहा भएकी छन् ।

डाँकाचोरी मुद्दामा गत मंसिर १० गते पक्राउ परेकी लामा ५० हजार रुपैयाँ धरौटीमा रिहा भएको कास्की जिल्ला अदालतका सूचना अधिकृत नील पनेरुले जानकारी दिए ।

दिक्छेनले बुझाएका प्रमाणका आधारमा उनी दोषी नदेखिएकाले फौजदारी कार्यविधि संहिता २०७४ अनुसार ५० हजार धरौटीमा रिहा गर्न न्यायाधीश श्रीकृष्ण भट्टराईको इजलासले पछि ठहरे बमोजिम हुने गरी आदेश गरेको हो ।

दिक्छेनमाथि पोखरा १० रक्षामार्गको १ घरबाट बहुमूल्य धातु डाँकाचोरी गरेको आरोप थियो । उनीविरुद्ध मंसिर ४ गते जिल्ला प्रहरी कार्यालय कास्कीमा जाहेरी परेको थियो ।

उनीमाथि कात्तिक ८ गते २० लाख रुपैयाँ जतिका बहुमूल्य धातु र मूर्ति डाँकाचोरी गरेको आरोप लागेको थियो ।

लामामाथि रोनित गुरुङको कोठाबाट प्रतिअम्खोरा २४ तोलाको चाँदीका ७ अम्खोरा, बुद्धको मूर्ति र ५ अरु मूर्ति चोरेको आरोपमा गुरुङले जाहेरी दिएका थिए ।

तर लामाले भने आफूले ती मूर्ति काठमाडौंमा खरिद गरी काठमाडौं, पोखरा र हेटौडामा लगेर पूजा गर्ने गरेको भन्दै फोटासमेत अदालतमा पेस गरेकी थिइन् । अदालतमा दिएको बयानमा लामाले आफूमाथि लगाइएको आरोप झुठो भएको दाबी गरेकी थिइन् ।

हेटौडा जाँदा आफू र छोराका सबै कपडासहित पूजा गर्ने गरेको मूर्ति सांसद मनाङेले गाडीमा राखेर पठाएको उनले बयान दिएकी छन् । ‘९ गते प्रहरी आएर ती मूर्ति झिकेपछि मविरुद्ध प्रहरीमा उजुरी परेको थाहा पाएँ,’ उनले अनुसन्धान अधिकारीसँग भनेकी छन्, ‘ती मूर्ति मैले काठमाडौं बस्दा नै किनेर पूजा गर्दै आएकी थिएँ । ममाथि किन झुठो आरोप लगाइयो, थाहा छैन ।’

आफू कात्तिक ७ गते साँझ पोखरा आएर छोराको दसैं गृहकार्यका कापी छाडेर ८ गते फर्किएको उनले बयान दिएकी छन् । त्यस बेला आफू पति मनाङेको कोठामा नगएको उनको दाबी छ ।

तर ८ कात्तिकमा साढे १२ बजे दिक्छेनसँगै ५ जना आफ्नो कोठामा प्रवेश गरी सामान चोरेर लगेको देखेको रोनित गुरुङले जिकिर गरेका थिए ।